Приказна за две деца

Наташа Брезовска-Богоевска е македонска писателка за деца и возрасни.

Наташа Брезовска-Богоевска е родена во декември 1971 година во Гостивар. Основно училиште завршува во родното место. Средно училиште започнува во Гостивар, а завршува во „Јосип Броз Тито“, Скопје. Дипломира Македонска книжевност и јужнословенски книжевности со македонски јазик на Филолошкиот факултет „Блаже Конески“, Скопје.

Две децении работи како наставничка во ООУ „Стојан Бурчевски Буридан“ с. Иванковци ‒ Велес. Од 2021 година работи во Локалната библиотека „Гоце Делчев“ Велес.

Во своето работно искуство како наставничка е долгогодишна менторка на ученици со кои освојува награди и признанија на општинско, државно и меѓународно ниво. Тринаесет години го уредува училишниот весник „Цутар“. Еден мандат е претседателка на Друштвото на македонски јазик и литература на град Велес, еден мандат членува во организацискиот одбор на Сојузот на Друштвата на македонски јазик и литература за подготовка на државни натпревари. Во своето работно искуство како наставничка изработува сценарија и режира театарски претстави за училиштето и општината.

Како библиотекарка, таа е носителка и реализаторка на проекти од Библиотеката и Министерството за култура.

Член е на жири-комисија за Детски Рацинови средби.

Учествува со свои излагања на меѓународни конференции.

 Творештво

Авторка на песни и раскази за деца, млади и возрасни, објавени во заеднички збирки и антологии. Авторка на прилози објавени во „Просветен работник“ и „Колибри“. Соработничка е со детските списанија „Другарче“ и „Росица“, каде што објавува свои раскази.

Нејзините раскази се наградувани на државно и меѓународно ниво.

 Дел од книгите се преведени на англиски јазик.

Наташа Брезовска-Богоевска ги напишала следниве книги:

• „Детства“ – раскази за деца и млади, 2020 (промовирана на Детски Рацинови средби);
• „Авантурите на желчето Тео“ ‒ сликовница, 2020 (добитничка на награда за најдобра книга ‒ сликовница на Денови на македонската литература за деца 2020);
• „Приказна за две деца“ ‒ раскази за деца, 2023;
• „Нишки до срцата“ ‒ раскази за возрасни, 2023 (промовирана на Саемот на книга);
• „Шумски приказни“ ‒ книга ‒ сликовница, 2023.

Застапена е во заедничките изданија

• „Литературни искри“ ‒ 2017, 2020, 2024;
• „Симфонија на срцето 4“, 2020;
• „Карантински приказни“, 2020 (електронско издание);
• „Различни светови“, антологија, 2023;
• „Детски соништа“, антологија, 2023;
• „Стихувалки“ ‒ 2019, 2022, 2023, 2024.

Награди и признанија

• Добитничка на награда за најдобра режија на театарска претстава на „Драмски аматерски фестивал“, Кочани;
• Добитничка на награда за најдобра книга ‒ сликовница на Денови на македонската литература за деца 2020 „Едука Мак“ во соработка со КИЦ Бугарија;
• Добитничка на втора награда за поетска творба на Сојуз на просветни работници;
• Добитничка на трета награда за расказ на наградниот конкурс „Секоја капка спомени“ во организација на „Макпрогрес“;
• Добитничка на прва награда на меѓународниот конкурс „Божиќна приказна“;
• Добитничка на прва награда на државниот конкурс по повод „Месецот на книгата“ при Домот на култура „Илинден“ и НБ „Петре М. Андреевски“ Демир Хисар;
• Добитничка на прва награда на конкурсот „Магија на карневалската маска“ при ЛУБ „Благој Јанков Мучето“ Струмица;
• Добитничка на трета награда на конкурсот за краток расказ „И цвеќе и шлаканица“ во организација на Организација на жени во Битола и НУУБ „Св. Климент Охридски“ – Битола.