Објавено на Остави коментар

ОБЈАВЕНА КНИГАТА „КОЈ Е ГЛАВЕН ДЕНЕС“ ОД НАТАША КОНЦ ЛОРЕНЦУТИ

Во издание на „Бата прес“ излезе од печат книгата за деца и млади „Кој e денес главен“ од словенечката писателка Наташа Конц Лоренцути. Книгата на македонски ја преведе универзитетската професорка Лидија Аризанковска, а илустрациите се на познатата словенечка илустраторка Тања Комадина. Објавувањето на ова дело е подржано од Европската Унија  и Министерството за култура,  во рамките на проектот „За нивната иднина“ со кој „Бата прес“, оваа и минатата година во програмата „Креативна Европа“ објавува петнаесет книги за деца и млади од петнаесет познати европски автори.

Книгата за деца и млади „Кој денес главен“ е духовита и интересна приказна со преубави илустрации. Приказната ја следи Ника. Таа е најмалото девојче во семејството и едвај чека да биде главна. И тоа ќе се случи, се разбира. Но, пред да биде главна треба да поминат неколку годишни времиња и треба да направи неколку урнебесни работи, да патува, да си игра, да научи нешто ново и малку да порасне…

Наташа Конц Лоренцути (1970) дипломирала на Академијата за театар, радио, филм и телевизија во Љубљана, каде што и магистрирала во 2010 година. Во периодот од 1994 година до 1999 година била ангажирана како актерка во два професионални словенечки театри, а од 1999 година се посветила на литературата. Досега има објавено тринаесет книги за деца и млади и три книги за возрасни. Нејзините книги биле номинирани за наградата „Оригинална словенечка сликовница“ и наградата „Модра птица“, а исто така по двапати за наградите „Десетница“ и „Вечерница“. Нејзината проза за возрасни трипати ја освоила наградата „Женски глас“, а два пати ја освоила наградата „Младика“ во Трст. Покрај нејзината работа како писателка, десет години предавала драма во средното училиште „Нова Горица“, каде што учениците ги играат нејзините драми.

A book on a shelf

Description automatically generated
A book on a table

Description automatically generated
Објавено на Остави коментар

Базар на книги во „Веро центар“

Осми март е ден ЗА НЕА – за вашата мајка, сестра, баба, другарка, пријателка, колешка, сосетка, соработничка… ЗА НЕА, која заслужува да ја храни својата духовна сила. ЗА НЕА, која заслужува да има слободно време за себе, за читање. ЗА НЕА, која заслужува подарок КНИГА!

Од денес до недела, нашите издавачи се на Осмомартовски книжевен базар во „Веро Центар“. Тука сме за 8 Март, ЗА НЕА, за книга ЗА СЕКОЈА ЖЕНА!

Објавено на Остави коментар

Бараме PHP програмер за имплементација на виртуелен ПОС од Халкбанка

Бараме PHP програмер за имплементација на виртуелен ПОС од Халкбанка

Поради промените кои „Халкбанка“ ги направи во нивниот виртуелен ПОС за трансакции, на нашата веб страница, новата верзија бара промени во кодот и ќе биде потребно повторно поврзување на нашата веб страница со банката. Тие очекуваат прво да се тестира во пробна околина, а потоа да се префрлиме на продукциска околина. Од она што нè информираа од банката е дека досегашниот алгоритам hash ver1 по 15 март нема да биде поддржан и нема да можат да се прават трансакции и ќе можат да се прават трансакции само со алгоритмите ver2 и ver3.

Од банката ни ги приложија потребните документи за интеграција што можат да се користат за миграцијата. За какви било прашања, ќе ви биде доставен и имејлот за контакт за поддршка од „Пејтен“ во Турција.

Нашата веб страница е работена со популарниот модул Woocommerce во WordPress. Доколку имате искуство и исклучително високо познавање од оваа област, ве молиме пишете ни ја вашата понуда на info@batapress.mk.

Објавено на Остави коментар

„Стокомак“ акција за Осми март

Од утре во сите маркети на „Стокомак“ нашата најнова книга „Забранети задоволства“ од Елизабет Хојт по одлична цена од само 199 денари. Оваа цена важи само во маркетите на „Стокомак“ и само за време на акцијата. Книгата за времетраењето на акцијата нема да може да се купи од друго продажно место.

Ова е одлична можност навреме да обезбедите подарок за понежниот пол за Осми март.

Повеќе за книгата:

Нивните животи беа совршени сѐ додека не се запознаа.

Леди Хиро Батен е занесна млада дама што ѝ припаѓа на самата елита на аристократијата. Таа е родена сестра на војводата од Вејкфилд и ништо не ѝ недостасува. Верена е за маркизот од Мендевил, за кого смета дека е досаден и нема смисла за хумор… Ама не ѝ пречи. Сѐ додека не се сретна со братот на маркизот!

Лордот Грифин Ридинг воопшто не е совршен. Всушност тој е еден многу мистериозен тип за кого никој не знае како му поминува денот, ама затоа е општопознато дека ноќе присуствува на разновидни развратни забави… Уште кога првпат го виде, Хиро почувствува одбојност, а Грифин пак мисли дека таа со својата добротворна работа и беспрекорните манири е премногу совршена за неговиот брат. Нивното постојано надмудрување и битка со зборови се разгоруваат во незапирлива страст која се заканува како кули од карти да ги разурне нивните уредени светови.

Можат ли двата несовршени лика

да пронајдат совршена, вистинска љубов?

Ова е втората од неколкуте романтични и секси љубовни романси, што авторката Елизабет Хојт ги објави по 2010 година. Најпребирливите читатели неодамна имаа можност од оваа серија да ја прочитаат книгата „Опасни намери“, а при читањето на „Забранети задоволства“ ќе се потсетат на настаните и нејзините главни ликови.

„Опојна комбинација на љубовна приказна, историски роман и бајка… Предизвикувачка, сензуална и забавна сторија со несекојдневни главни јунаци, што ќе ги воодушеви читателките што се жедни за длабоки и вистински чувства.“

Буклист

Објавено на Остави коментар

Акција во „Стокомак“

Од денес во сите маркети на „Стокомак“, нашата најнова книга „Опасни намери“ од Елизабет Хојт и на ваше барање безвременската книга „Снеговите на љубовта“ од Нермин Безмен по одлична цена од само 199 денари. Оваа цена важи само во маркетите на „Стокомак“ и само за време на акцијата.

И двете книги се со првенствено романси. „Опасни намери“ е прва книга од серијата книги „Мејден лејн“ и е исполнета со неизвесни случки што навистина ќе ви го задржат вниманието, но исто така е исполнета и со страсни и еротски моменти.

„Снетовите на љубовта“ е книга што предизвика неверојатен интерес во Македонија и во светот. Напишана е од Нермин Безмен и е базирана на вистинити настани, а главниот лик Курт Сеит бил офицер во руската армија и е дедо на авторката. Долги години Нермин го истражувала животот на својот дедо и неговата силна љубов кон преубавата руска благородничка Шура. Култна книга по која беше снимена серијата што се прикажуваше кај нас и достигна неверојатна популарност.

Од корицата на „Опасни намери“

„Возбудлива, романтична, психолошка
и секси сторија за најпребирливите читателки…“
Озлогласен поради своите диви, еротски потреби, Лазар Хантингтон, лордот Кер, е во потрага по бруталниот убиец во Сент Џајлс, во најозлогласениот лондонски кварт. Младата и преубава вдовица Темпранс Дус, одлично го познава Сент Џајлс – целиот живот го поминала грижејќи се за неговите деца во сиропиталиштето што го води нејзиното семејство.
Понудата на лордот Кер е едноставна: ако Темпранс му помогне да го пронајде патот низ опасните улички на Сент Џајлс, за возврат ќе ја внесе во високите лондонски кругови за да пронајде мецена за својот дом за сираци.
Но, Темпранс не е толку невина колку што можеби изгледа. Она што на почетокот изгледа како студена рамнодушност наскоро прераснува во страст што ни тој, ни таа не можат да ја контролираат и што може да ги уништи.
„Опојна комбинација на љубовна приказна, историски роман и бајка… предизвикувачка, сензуална и забавна приказна со несекојдневни главни јунаци, што ќе ги воодушеви читателките што се жедни за длабоки и вистински чувства.“
Буклист

Од корицата на „Снеговите на љубовта“

Една снежна ноќ, додека во блескавата Москва одекнуваат нотите на Чајковски, младиот царски офицер Сеит на бал ја запознава занесната благородничка Шура. Волшебниот миг во кој погледите им се сретнуваат засекогаш ќе ја смени нивната судбина. Потполно маѓепсани еден од друг, двајцата млади знаат дека за нив никогаш не може да постои никој друг, без разлика на сѐ што ги разделува.

Од живописната Јалта на крајот на XIX век, до волшебната раскошна Москва и Цариград, оваа трогателна приказна ги следи Сеит и Шура, што во опасниот виор на историски превирања се борат само за едно – правото на своја љубов.

Првата светска војна, руската револуција, страдање, пекол… Сепак, нивните срца ќе сторат сè, за да останат посилни од татнежите на топовите.

Според безвременската и легендарна сага на Нермин Безмен, напишана по вистинити настани, снимена е една од најскапите и најпопуларните телевизиски серии која под наслов „Снеговите на љубовта“ беше прикажувана и кај нас…


Објавено на Остави коментар

ОБЈАВЕН РОМАНОТ ЗА МЛАДИ „УБОДИ“ ОД ДИАДРЕ САЛИВЕН

Во издание на „Бата прес“ излезе од печат романот за млади „Убоди“ од ирската писателка Диадре Саливен. Книгата од англиски на македонски ја преведе Ацо Пероски. Објавувањето на ова дело е подржано од Министерството за култура и ЕУ,  во рамките на проектот „За нивната иднина“ со кој „Бата прес“, во минатата и во оваа година под програмата „Креативна Европа“ објавува петнаесет книги за деца и млади од петнаесет познати европски автори.

Романот „Убоди“ е трогателно сурова исповед на тинејџерка која се обидува да води нормален живот, откако преживеала злоставување во семејството,.

Главниот лик Сес, сака да завладее со уметноста на тетовирањето, да создава преубави слики на кожата. Меѓутоа, уште е премлада за тоа, а има и поважни грижи во животот. Секако најголема грижа е како да се дочека полнолетството, а да не се распадне поради страшната тајна што не може да ја сподели со никој. Тајната што го разурнува нејзиното семејство, толку страшна тајна што и нејзините најблиски се преправаат дека ништо не се случило.

Авторката Диадре Саливен е писателка за деца и поетеса. Таа е родена во Галвеј, Ирска и сега живее во Даблин. Таа има напишано повеќе книги од кои неколку биле номинирани за награди и ја освоила престижната награда „Книга на годината“ на ЦБИ.

Објавено на Остави коментар

Како „таа книгата со октоподот“ освои повеќе од милион читатели

Со октоподот како наратор, книгата на Шелби Ван Пелт, „Неверојатно бистри суштества“ има впечатлива моќ за опстанување и повторно се врати на листата најпродаваните книги – дури една и пол година по објавувањето.

Минатата година за време на празничните попусти, Бет Сефер Бас имала необично барање од купувачите во „Букмарк“, независната книжарница каде што работи во Винстон Салем, Њујорк.

„Постојано прашуваа, ја имате ли таа книгата со октоподот?“ вели таа.

Бет точно знаела на која книга мислеле: „Неверојатно бистри суштества“ на Шелби Ван Пелт, романот во кој главен лик е растегливиот, палав октопод.

Порастот на побарувачката бил неочекуван, бидејќи романот бил објавен неколку месеци порано, во текот на пролетта во 2022 година. Дури уште поизненадувачки било што продажбата продолжува да се зголемува по новогодишните празници, во текот на зимата и пролетта во 2023 година, и никогаш не почнала да опаѓа. „Таа книгата со октоподот“ беше на листата на најпродавани книги на „Букмарк“ дури и во текот на цела 2023, и побарувачката повторно се зголеми за овие новогодишни празници.

„Мислам дека нема да престане, бидејќи секој што ќе ја прочита, сака и другите луѓе да ја прочитаат“, вели Сефер Бас, која подарила два примероци на тетките за Божик. „Ова е универзална препорака. Без разлика низ каков период поминувате и во какво расположение се наоѓате, можам да ви ја ставам оваа книга в раце.“

Во непредвидливото опкружување на пазарот, каде бестселерите се создадени преку заразни „Тик Ток“ објави и премногу жанровски трендови, „Неверојатно бистри суштества“ е една од оние сè поретки успешни приказни: тивок, чудесен литературен почеток и прв роман, што е популаризиран од љубовта на книжарите во книжарниците и нивните усни препораки.

До денес, романот е продаден во повеќе од 1 400 000 примероци, што е неверојатен подвиг за прв роман во кој главниот раскажувач е октопод. Овој декември, продажбата на книгата го надмина минатогодишниот бум и романот неодамна повторно се појави на листата на најпродавани книги на „Њујорк тајмс“, во категоријата на книги во тврд повез.

Иако многу од факторите што ѝ носат зголемена побарувачка на книгата „Неверојатно бистри суштества“ се посебни, оваа патека исто така ја одразува тековната промена на бизнисот со книги, па така продажбата на постари наслови ја надминува продажбата на нови наслови. Од најпродаваните 50 книги за возрасни од областа на белетристиката во 2023 година, само 16 од нив биле објавени во 2023, додека останатите се од претходните години, според „Сиркана Букскен“, кои ја следат продажбата на печатени книги. Некои од овогодинешните најпродавани прозни романи, вклучувајќи ги „Утре и утре и утре“ на Габрел Зевин и „Лекции по хемија“ од Бони Грамус се објавени пред повеќе од година и пол, а и двата романи имаат подобри бројки од лани.

Несекојдневната сила на опстанок на „Неверојатно бистри суштества“, го изненади нејзиниот издавач „Еко“. Вообичаено, продажбата на книгите е најсилна во неделите по објавувањето, кога има експлозија од медиумско внимание и рецензии, а потоа опаѓа. Но, по кусото затишје во 2022 година, продажбата на „Неверојатно бистри суштества“ се намали, а потоа со светлосна брзина се врати на листите на најпродаваните книги во 2023 година. До денес издавачот „Еко“ има испечатено 28 изданија од книгата.

„Ги има сите примеси на органски раст“, вели Кристен Меклин, аналитичар од оваа област во „Сирјкана Букскен“.  „Се вративме на традиционалниот добар начин на усни препораки од книжарот или од пријателот“.

Ван Пелт, која е поранешна финансиска советничка, првпат идејата што се претворила во роман ја имала во 2013 година, кога одела на работилница за пишување во „Имори“ универзитетот во Атланта. Една од задачите била да напише кратка приказна од необична перспектива, и таа смислила интересен октопод на кој му е досадно и е фрустриран од неговиот ограничен простор во аквариумот. Нејзиниот учител ја тргнал настрана и ѝ предложил да изгради повеќе елементи за ликот и така таа почнала да пишува белешки за октоподот.

На почетокот, не се грижела многу за тоа што се одлучила на креативен ризик со тоа што како лик го имала многу паметниот и бистриот октопод, кој бил раскажувач и протагонист, бидејќи таа не ни помислувала дека нејзината книга некогаш ќе биде објавена. „Не размислував премногу за тоа дали е ова нешто што се продава“, вели таа, „бидејќи никогаш не помислив дека некој ќе го прочита ова“.

Таа продолжила да си поигрува со ликот и видела потенцијал можеби за роман, но сфатила дека би било претешко да се состави цела книга од перспективата на еден октопод. Потоа ја смислила Това, седумдесетгодишната вдовица со болно минато што работи како чистачка во аквариумот. Приказната се одвива во измислен град на северозападот на Пацификот, каде Ван Пелт пораснала. Това е лик базиран на мудрата баба на Ван Пелт, која била Швеѓанка.

Това развива цврста врска со Марселус, џиновскиот пацифички октопод што е во аквариумот. Во текот на раскажувањето, Това му се доверува на Марселус додека се осврнува на нејзиното минато, кое ѝ создава рана бидејќи нејзиниот син исчезнал пред неколку децении, и ја прави нејзината иднина неизвесна за жена што живее сама во подоцнежни години. Како што се продлабочува нивната врска, таа му помага на Марселус да добие малку слобода и да се извлекува од своето место секоја вечер.

Документарецот „Мојот учител октопод“ беше вистинско изненадување и цврсто го започна процесот на октоподот како симбол. Нетфликс

Ван Пелт неколку години ги пишувала одново и одново првите неколку глави, сè додека таа и нејзиниот партнер во пишувањето книги склучиле пакт да ги завршат нивните книги. Најголемиот, грубиот дел го напишала во текот на 2020 за време на пикот од пандемијата, кога била дома со нејзините деца, тогаш на четиригодишна и шестгодишна возраст.

Во ноември 2020, го испратила ракописот до неколку агенти. Една од нив, Кристин Нелсон, веднаш ѝ вратила. „Мојот помошник ме побара и ми рече: овој ракопис дојде кај мене и или е брилијантен или е чиста глупост, бидејќи внатре има октоподот што зборува“, се сеќава Нелсон.

На среќа, во одличен момент, ракописот беше испратен кај издавачите, кусо по објавувањето на познатиот документарец „Мојот учител октопод“, кој се базира на изненадувачката врска што се развива помеѓу човек и див октопод.

„Не можеше да испадне подобро од ова, дури и да се обидев да го испланирам“, вели Ван Пелт.

Кога Хелен Асма, уредничката во издавачката куќа „Еко“, го слушнала описот за книгата, била заинтересирана и по малку скептична. Таа го имала гледано „Мојот учител октопод“ и била заинтересирана за замислено претставување на умот на еден октопод, но се прашувала дали ќе добро ќе помине. „Си помислив, леле, ова ќе биде незгоден глас за да пробие“, вели таа. „Се сеќавам дека си велев себеси, или ќе биде предобро или ќе биде за никаде“.

Првата глава што почнува од перспективата на Марселус, кој се обидува да се спротивстави на заробеништвото во неговиот живот, со што Асма веднаш била придобиена. „Еко“ веднаш ги купи правата за книгата на аукција, со аванс кој содржи шест бројки, и веднаш беше позиционирана како една од најголемите дебитанти за 2022 година.

Романот имаше силен старт тој мај, со голем број нарачки од независните книжарници, „Таргет“ и „Барнс енд Нобл“. Доби уште поголема сила кога Џена Буш ја одбра во нејзиниот клуб на читатели „Читајте со Џена“, што допринесе Ван Пелт да се појави на шоуто „Тудеј“. Беше ставена на листата на „Некст лист пик“, компилација од нови книги создадена од независните книжарници, и се искачи на листата „Њујорк тајмс“, за најпродавани книги во првата недела од објавувањето. Вниманието било возбудливо но и нервозно за Ван Пелт, која дотогаш била домаќинка, мајка што не е навикната на јавни настапи.

Кусо по објавувањето, славата на книгата почна да паѓа. Романот се тргна од листата на „Њујорк тајмс“ и продажбата стагнираше за време на летото.

Неколку месеци подоцна, за време на празниците, се појави на неколку листи „најдобрите за 2022“ и побарувачката повторно се зголеми. Стана омилена во читачките клубови, и Ван Пелт имаше настани во стотици читачки клубови, книжарници и литературни фестивали. Досега оваа година се продадени повеќе од 1.1 милион примероци, трипати повеќе од 2022 година кога беа продадени 300 000 примероци.

Даниел Голдин, кој работи во „Босвел бук компани“ во Милвоки, вели дека „Неверојатно бистри суштества“ била омилена меѓу вработените и тој и неговите колеги ја препорачувале на купувачите. Но, сфати дека книгата е евергрин, кога купувачите продолжиле да доаѓаат во книжарницата и да ја бараат книгата, дури една година по објавувањето.

„Секогаш барате книга што се продава доволно добро, така што купувачите почнуваат да си ја продаваат едни на други, и тоа е она што се случи со оваа книга“, вели тој. „Понекогаш достигнува светлосна брзина.“ Продажбата на примероците во тврд повез беа толку големи што дури „Еко“ почна да размислува дали воопшто да печати со мека корица, што сега е предвидено да се направи на зима во 2025. Книжарниците очекуваат дека продажбата на „Неверојатно бистри суштества“ повторно ќе блесне штом ќе се објави книгата во мек повез и ако се направи филмска адаптација (во моментов се развива филмот во „Анонимус контент“ и „Клубхаус пикчрс“).

Во меѓувреме, Ван Пелт, која живее надвор од Чикаго, продолжи да оди се сретнува со читателите во читачките клубови. Често, кога посетува книжарница или библиотека, ѝ велат дека читателите ја викале „таа книгата со октоподот“.

„Требаше да се вика „таа книгата со октоподот“, вели Ван Пелт. “Тоа ќе беше подобар наслов.“.

Александра Алтер

„Њујорк Тајмс“

Објавено на Остави коментар

Објавена книга за деца и млади „Алма и седумте чудовишта“

Во издание на „Бата прес“ излезе од печат книгата за деца и млади „Алма и седумте чудовишта“ од шпанските писателки Ирија Г. Паренте и Селене М. Паскуал. Автор на илустрациите е Ирис Де Муј, а од шпански на македонски јазик ја преведе Катерина Јосифовска.

Објавувањето на ова дело е подржано од Министерството за култура и Европската унија и е во рамките на проектот „За нивната иднина“ со кој „Бата прес“, во оваа и во наредната година во програмата „Креативна Европа“ ќе објави 15 книги за деца и млади од 15 познати европски автори.

-Имагинарните чудовишта живеат под креветот на Алма, но не станува збор за хорор приказна, иако во неа има стравови и темнина. Ова е поинаква, поучна приказна, во која, како што забележуваат книжевните критичари „се запознаваме со чудовиштата за да им се спротивставиме“, соопштија од издавачката куќа.

Ирија Г. Паренте (1993) и Селене М. Паскуал (1989) се од Мадрид и Виго. Својот прв роман „Хартиени латици“ (2012) го напишаа заедно и го објавија бесплатно на интернет. На тој начин успеаја да привлечат повеќе од 10.000 читатели. Романот ги поттикна да пишуваат и тие продолжија да творат.

Во 2014 година го објавија романот „Алијанси“, првата книга од трилогијата „Приказни за полната месечина“.

Популарниот шпански дневен весник Ел Паис го прогласи овој роман за една од најдобрите книги за млади во 2014, а во 2015 година, со истиот роман ја освоија позната национална книжевна награда El templo de las mil puertas.

Објавено на 1 Коментар

Одлични наслови за 199 денари

Од 20.10 до 26.10, во сите маркети на „Стокомак“ нашите три најнови книги по супер цена од 199 денари. Акцијата важи само во маркетите на „Стокомак“ и на ниедно друго место. Дури ни кај нас. Цената важи само во маркетите, додека трае акцијата и додека има залиха. За оваа акција одлучивме да ви понудиме три сосем различни наслови и сите се посебни на свој начин.

  1. „Сите исчезнати девојки“ од Меган Миранда

Поминаа десет години откако Николет Фарел – Ник, го напушти провинциското гратче Кулеј Риџ, откако нејзината најдобра пријателка Корин исчезна без трага. Ник е верена за успешен адвокат од високите кругови во Филаделфија, успеала да изгради завидна кариера, ама враќањето во родното место
ги отвора старите рани. Средбата со некогашните пријатели и поранешниот младич Тајлер кај Ник предизвикуваат неочекувани чувства, а демоните од минатото ја гризат од внатре. Што се случило онаа кобна ноќ кога корин исчезна од забавниот парк? Николет е повторно влезена во центарот на шокантна драма, а случајот стар десет години повторно е отворен. Сега, кога исчезна уште една девојка од нивната стара дружина, Аналеис Картер, јазолот од тајни и лаги на прв поглед изгледа нерешлив, а во ноќниот кошмар Тајлер е единствено засолниште за Ник. Дали ник е невина жртва или фатална жена, останува
неизвесно до самиот крај на овој врвно напишан психолошки трилер.


„Восхитувачки психолошки трилер за девојката што мора
да се соочи со своите најмрачни стравови и да ги победи
демоните од минатото“, ВОЈА


„За сите што сакаат паметно напишана мистерија со доза на
романтика“, Bookish.com


Mеган Mиранда е американска писателка најпозната
по наградуваниот роман и Њујорк тајмс бестселер
„Сите исчезнати девојки“. Напишала и неколку романи за млади: „Фрактура“, „Хистерија“, „Одмазда“, а
поттикната од успехот на својот прв трилер, ги напиша психолошките трилери „Совршениот странец“, „Последниот гостин“, „Толку тивко место“, „Единствените
преживеани“ и „Последниот исчезнат“.

2. „Оние што си заминаа и оние што останаа“ од Паринуш Сание

Мајка! Колку моќно звучи тоа. На овој свет веројатно нема ништо посилно од мајчинството. Дури ни оние што заминале од своето родно место, во потрага по подобар и поудобен живот, далеку од своето огниште не можат да ја раскинат оваа врска. Луѓето постојано се во потрага по поубава средина, може да се каже отсекогаш и од секаде. Но, во седумдесеттите и осумдесеттите години од минатиот век, Исламската револуција предизвикува неверојатен егзодус и иселување на Иранците низ светот. Речиси не останува некое градско семејство, а да не е распарчено и да нема некој од тоа семејство што не заминал од татковината. Од својот дом. Долги години живеат разделени, без можност да се видат или да бидат во некаков контакт.
Разделбата е до тој степен, што дури има браќа и сестри што не се разбираат и само варијациите на правописот од нивните презимиња е сè што останало од нивната некогашна цврста врска.
Оваа книга ја раскажува приказната за семејното обединување на мајката и нејзините шест деца со нивните сопружници по триесет години разделба. На почетокот, сите се возбудени, полни со љубов
и се запознаваат со новите членови на семејствата. Се сеќаваат на златните денови од нивното детство. Се гостат со вкусните персиски јадења по кои копнеат додека се во странство.
Но, наскоро ќе почнат да се појавуваат несогласувања за политичките и општествените прашања. Тензиите се зголемуваат и тајните ќе испливаат на површината. Оние што заминаа имаат бледи
сеќавања на убавите денови од младоста. Оние што останаа имаат замисла дека светот од другата страна е совршен. Ниту двете страни немаат вистинска претстава за животот далеку од нивните очи.
Сега останува само едно нешто што ги врзува двете страни и може да ги натера да зборуваат, да си ги кажат маките и да се обидат да се запознаат одново: Нивната Мајка.

Уште еден бестселер на Паринуш сание, авторката на светски познатите хит ­романи „Запишано во ѕвездите“ и „Го сокрив мојот глас“, објавени на македонски јазик во 2017 и 2018 година.

3. „Совршениот господин“ од Лорета Чејс

Примерниот!
Наследникот на грофот од Харгејт, Бенедикт Карсингтон, виконтот од Ратбурн, е совршен аристократ. Висок, црн и привлечен, познат по своите беспрекорни манири и доброто потекло. Бенедикт ги познава сите општествени правила и не му претставува никаков проблем да ги почитува – сѐ додека не се појави таа.

На лош глас.
Батшеба Вингејт е припадничка на лошата гранка на фамилијата Де Лусеј – позната по озлогласените лажговци и измамници. Не е ни чудо што токму затоа, нејзиниот маж, инаку син на благородничка фамилија, останал без наследство. Кога станала вдовица, со скромни приходи, Батшеба решила на својата ќерка да ѝ обезбеди стабилен живот и пристојно воспитување. Никој и ништо нема да ги
попречи нејзините планови – сѐ додека не се појави тој.

Совршениот!
Но, тогаш немирната ќерка на Батшеба, го привлекува бистриот внук на Бенедикт за потрага по легендарно богатство. За да ги спасат витезите-скитници, Бенедикт и Батшеба тргнуваат во спасувачка мисија што ќе ги доведе во опасна, интимна блискост. Тоа е состојба што речиси гарантира хаотична завршница – дури и скандал! – ако во неа биде вклучен кој и да е друг. Но, Бенедикт држи сѐ
под совршена контрола. Под совршена контрола и покрај неговата луда желба да ги прекрши сите правила.

Совршена контрола?
Како да не…


„Уште една возбУдлива, романтична, на моменти секси сторија.“
‒ Џулиј

Објавено на Остави коментар

Објавена книгата „Диносаурус“ од Аевар Тор Бенедикстон

Во издание на „Бата прес“ се објави книгата за деца и млади „Диносаурус“ која е дел од серијалот „Твојата сопствена приказна“. Автор на книгата е познатиот исландски писател за деца и млади Аевар Тор Бенедиктсон (Ævar Þór Benediktsson). Илустрациите се дело на познатата илустраторка Евана Киса. Романот од исландски на македонски јазик го преведе Мери Кицовска. Објавувањето на ова дело е подржано и од „Исландскиот центар за литература“ и е во рамките на проектот „За нивната иднина“ со кој „Бата прес“, во текот на оваа и во наредната година со поддршка од Европската унија, во програмата „Креативна Европа“ ќе објави 15 книги за деца и млади од 15 познати европски автори.

Во оваа приказна главни се диносаурусите. Децата ќе сретнат различни видови на диносауруси и ќе имаат авантура со птеросауруси, велоцираптори и бебиња диносауруси. Но, иновативно и интересно е што самиот читател е вклучен во приказната. Децата сами може да одлучат што ќе се случи. Секогаш кога приказната ќе заврши лошо, тие можат одново да ја читаат. Има многу различни краеви.

Книгите на Аевар Тор Бенедиктсон каде што читателот е самиот одговорен за приказната, се многу популарни и наградувани во Исланд. Овој серијал е препознатлив по кусите поглавја, патувањето низ времето и едноставниот текст препорачлив за почетници во читањето.

Книгата е отпечатена со фонт што им го олеснува читањето на дислексичарите.

Аевар Тор Бенедиктсон е роден 1984 година во Исланд. Тој е еден од најпознатите исландски писатели и има објавено 30 книги. Покрај литературните награди, има освоено и награди за филмски и драмски сценарија, а има и значаен придонес во науката и образованието.